తొలి శుభోదయం న్యూస్ ప్రకాశం పోలీస్ :-

బ్రహ్మంగారి తిరునాళ్ల సందర్భంగా భారీ సంఖ్యలో భక్తులు తరలివచ్చే నేపథ్యంలో, జాళ్లపాలెం గ్రామంలో భద్రతా ఏర్పాట్లను మరింత బలోపేతం చేసేందుకు ప్రకాశం జిల్లా ఎస్పీ ఆదేశాల మేరకు కందుకూరు డీఎస్పీ స్వయంగా పర్యటించి సమగ్రంగా పరిస్థితులను పరిశీలించారు. ఆలయ పరిసర ప్రాంతాలు, ప్రధాన రహదారులు, పార్కింగ్ స్థలాలు మరియు భక్తుల రాకపోకలకు సంబంధించిన కీలక మార్గాలను పరిశీలిస్తూ, ఎలాంటి అవాంఛనీయ సంఘటనలు చోటుచేసుకోకుండా అన్ని జాగ్రత్తలు తీసుకోవాలని సంబంధిత పోలీస్ అధికారులకు స్పష్టమైన ఆదేశాలు జారీ చేశారు.భక్తుల భారీ రద్దీని దృష్టిలో ఉంచుకుని ట్రాఫిక్ నియంత్రణకు ప్రత్యేక ప్రణాళికలు అమలు చేయడం, వాహనాల పార్కింగ్‌ను సక్రమంగా నిర్వహించడం, అత్యవసర సేవల కోసం ప్రత్యేక మార్గాలను సిద్ధం చేయడం వంటి చర్యలను చేపట్టాలని సూచించారు. అదేవిధంగా, ఆలయ పరిసర ప్రాంతాల్లో నిరంతర నిఘా, సీసీ కెమెరాల వినియోగం, పహారా బందోబస్త్, క్యూలైన్ నిర్వహణ వంటి భద్రతా చర్యలను కట్టుదిట్టంగా అమలు చేయాలని ఆదేశించారు.పండుగ సమయంలో చిన్న చిన్న సమస్యలు కూడా పెద్ద ఇబ్బందులకు దారితీయవచ్చని పేర్కొంటూ, ప్రతి పోలీస్ సిబ్బంది అప్రమత్తంగా ఉండి తమ బాధ్యతలను నిబద్ధతతో నిర్వర్తించాలని డీఎస్పీ సూచించారు. భక్తులు కూడా ట్రాఫిక్ నియమాలు పాటిస్తూ, పోలీసులకు సహకరిస్తూ పండుగను ప్రశాంతంగా, సురక్షితంగా నిర్వహించుకునేలా సహకరించాలని కోరారు.ప్రజల భద్రతే లక్ష్యంగా పోలీస్ యంత్రాంగం అన్ని విధాలుగా సిద్ధంగా ఉందని, తిరునాళ్లను ఎటువంటి అంతరాయం లేకుండా విజయవంతంగా నిర్వహించేందుకు పూర్తి స్థాయిలో చర్యలు తీసుకున్నట్లు అధికారులు తెలిపారు.