తొలి శుభోదయం ప్రకాశం పోలీస్:-

రోడ్డు ప్రమాదాలను తగ్గించడం, యువతను మాదకద్రవ్యాల ముప్పు నుంచి కాపాడటం లక్ష్యంగా ప్రకాశం జిల్లా ఎస్పీ ఆదేశాల మేరకు, ప్రకాశం పోలీసులు జిల్లా వ్యాప్తంగా హెల్మెట్ వినియోగం మరియు మాదకద్రవ్యాల (డ్రగ్స్) నియంత్రణపై అవగాహన కార్యక్రమం నిర్వహించారు.ఈ కార్యక్రమంలో పోలీస్ అధికారులు రెండు చక్రాల వాహనదారులు తప్పనిసరిగా హెల్మెట్ ధరించాల్సిన అవసరాన్ని వివరించారు. హెల్మెట్ ధరించడం ద్వారా తల గాయాల ప్రమాదం గణనీయంగా తగ్గుతుందని, చిన్న నిర్లక్ష్యం కూడా ప్రాణాంతకంగా మారవచ్చని తెలిపారు. ట్రాఫిక్ నిబంధనలు పాటించడం, అతివేగం నివారించడం, మద్యం లేదా మాదకద్రవ్యాలు సేవించి వాహనాలు నడపకూడదని స్పష్టంగా సూచించారు.అలాగే మాదకద్రవ్యాల దుష్ప్రభావాలపై ప్రజలకు అవగాహన కల్పించారు. డ్రగ్స్ వినియోగం వ్యక్తి ఆరోగ్యాన్ని, కుటుంబాన్ని మరియు సమాజాన్ని తీవ్రంగా ప్రభావితం చేస్తుందని, యువత భవిష్యత్తును నాశనం చేస్తుందని అధికారులు హెచ్చరించారు. మాదకద్రవ్యాల అక్రమ రవాణా, విక్రయం, వినియోగానికి పాల్పడిన వారిపై చట్టప్రకారం కఠిన చర్యలు తప్పవని తెలిపారు.తల్లిదండ్రులు, ఉపాధ్యాయులు మరియు ప్రజలు అప్రమత్తంగా ఉండి, డ్రగ్స్‌కు సంబంధించిన అనుమానాస్పద కార్యకలాపాలు కనిపించిన వెంటనే పోలీసులకు సమాచారం అందించాలని కోరారు. సమాజం–పోలీసుల సమన్వయంతోనే మాదకద్రవ్యాల నిర్మూలన సాధ్యమని పేర్కొన్నారు.ప్రజల ప్రాణ రక్షణే పోలీస్ శాఖ ప్రధాన లక్ష్యమని, రోడ్డు భద్రత, డ్రగ్స్ నిర్మూలన దిశగా ఇలాంటి అవగాహన కార్యక్రమాలను నిరంతరం కొనసాగిస్తామని ప్రకాశం జిల్లా పోలీసులు తెలిపారు.