1.97 కోట్లతో నిర్మించనున్న తారురోడ్డు పనులకు శంకుస్థాపన చేసిన నాగేశ్వరరావు

13.5 లక్షలతో నిర్మించిన విలేజ్ హెల్త్ క్లినిక్ ప్రారంభం

స్థానిక ఎన్నికల్లో అన్ని స్థానాలు గెలుచుకుంటామని ఎమ్మెల్యే ధీమా

తొలి శుభోదయం న్యూస్ కందుకూరు నియోజకవర్గం:-

రాబోయే స్థానిక సంస్థల ఎన్నికల్లో నియోజకవర్గంలోని అన్ని సర్పంచ్, ఎంపీటీసీ, జడ్పిటిసి, ఎంపీపీ స్థానాలను గెలుచుకుంటామని కందుకూరు ఎమ్మెల్యే ఇంటూరి నాగేశ్వరరావు ధీమా వ్యక్తం చేశారు. ఈ రెండున్నర ఏళ్లలో వందల కోట్లతో తాము చేపట్టిన అభివృద్ధి సంక్షేమ కార్యక్రమాలే గెలిపిస్తాయన్నారు. గుడ్లూరు మండలం అమ్మవారిపాలెం నుంచి రాజుగారి చింతలపాలెం వరకు, పల్లె పండుగ 3.0 కింద 1.97 కోట్లతో నిర్మించనున్న తారురోడ్డు పనులకు ఆయన మంగళవారం శంకుస్థాపన చేశారు. 13.5 లక్షలతో కొత్తగా నిర్మించిన విలేజ్ హెల్త్ క్లినిక్ భవనాన్ని ఎమ్మెల్యే ప్రారంభించారు. ముందుగా ఎమ్మెల్యే నాగేశ్వరరావుకు, మండల టిడిపి అధ్యక్షులు జనిగర్ల నాగరాజు ఆధ్వర్యంలో ఘన స్వాగతం పలికారు. గుర్రంపై ఊరేగిస్తూ గ్రామంలోకి తీసుకు వెళ్లారు. సన్నాయి, బ్యాండు మేళాల నడుమ గజమాలతో సత్కరించారు.అనంతరం జరిగిన సభలో ఎమ్మెల్యే నాగేశ్వరరావు గారు మాట్లాడుతూ… కూటమి ప్రభుత్వంలో అర్హులందరికీ సంక్షేమ పథకాలను అందిస్తున్నామని చెప్పారు. ప్రభుత్వ పెద్దలు, అధికారుల సహకారంతో పెద్దఎత్తున అభివృద్ధి పనులు చేస్తున్నామన్నారు.నియోజకవర్గంలో గ్రామాల మధ్య లింకురోడ్లుకు తొలి ప్రాధాన్యత ఇచ్చి నిధులు మంజూరు చేస్తున్నామని నాగేశ్వరరావు చెప్పారు. పల్లె పండుగ 1,2 ద్వారా సిసి రోడ్ల నిర్మాణాలు భారీగా జరిగాయన్నారు. ఇండోసోల్, బిపిసిఎల్ పరిశ్రమల ద్వారా చదువుకున్న యువతీ యువకులకు ఉద్యోగ అవకాశాలు కల్పించాలన్న లక్ష్యంతో పని చేస్తున్నానని ఎమ్మెల్యే ఇంటూరి నాగేశ్వరరావు తెలిపారు. అమ్మవారిపాలెం చెరువును 20 లక్షలతో అభివృద్ధి చేశామని ఎమ్మెల్యే వెల్లడించారు. గ్రామ సమీపంలోని ఎలికేరుపై ఏడాదిలో బ్రిడ్జిలు నిర్మిస్తామని హామీ ఇచ్చారు. ఎస్సీ కాలనీ వాసులకు త్వరలో ఇళ్లపట్టాలు ఇస్తామని, గ్రామంలో మూడు బోర్లు ఏర్పాటు చేస్తామని ఎమ్మెల్యే తెలిపారు. రీ సర్వే ద్వారా గతంలో రైతులు ఎదుర్కొన్న ఇబ్బందులు అన్ని తొలగిస్తామని చెప్పారు. ఈ కార్యక్రమాల్లో గ్రామ టిడిపి అధ్యక్షుడు ముప్పా వీరశేఖర్, క్లస్టర్ ఇన్చార్జిలు చిత్తారి మల్లికార్జున, ఉమ్మనేని సుబ్బారావు, సొసైటీ అధ్యక్షులు నరాల మాలకొండారెడ్డి, దామా వెంకటేశ్వర్లు, పంచాయతీరాజ్ డిఇ మాలకొండయ్య, మాజీ ఎంపీపీ ఏసుదాసు, టిడిపి నాయకులు ఉన్నం వెంకటేశ్వర్లు, వెంకయ్య, మేకల మాల్యాద్రి, వేణు, రాఘవులు, మద్దసాని కృష్ణ, రమణమ్మ, పద్మ, సుమతి తదితరులు పాల్గొన్నారు.