తొలి శుభోదయం న్యూస్ కందుకూరు:-
నాగార్జున పబ్లిక్ స్కూల్లో హిందీ దివస్ను పురస్కరించుకుని ప్రీ-సెలబ్రేషన్స్ను ఉత్సాహభరిత వాతావరణంలో నిర్వహించారు. విద్యార్థుల్లో హిందీ భాష పట్ల ఆసక్తిని పెంపొందించడంతో పాటు, భారతదేశంలోని భాషా వైవిధ్యం మరియు సాంస్కృతిక విలువల పట్ల అవగాహన కల్పించడమే కార్యక్రమం ముఖ్య ఉద్దేశ్యంగా నిలిచింది.ఈ సందర్భంగా విద్యార్థులు హిందీ భాషకు సంబంధించిన ప్రసంగాలు, కవితలు, పాటలు, సాంస్కృతిక కార్యక్రమాలు తదితరాల్లో ఉత్సాహంగా పాల్గొన్నారు. విద్యార్థులు తమ ప్రతిభను చక్కగా ప్రదర్శిస్తూ కార్యక్రమాన్ని మరింత ఆకర్షణీయంగా మార్చారు.ఈ సందర్భంగా పాఠశాల డైరెక్టర్ శ్రీమతి వి. శాలిని రెడ్డి మాట్లాడుతూ, “భాష అనేది కేవలం భావాలను వ్యక్తపరిచే సాధనం మాత్రమే కాదు; అది మన సంస్కృతి, సంప్రదాయాలు మరియు భావోద్వేగాలను తరతరాలకు అందించే వారధి. విద్యార్థులు హిందీతో పాటు అన్ని భారతీయ భాషలను గౌరవిస్తూ, వాటి గొప్పతనాన్ని తెలుసుకోవాలి. ఇటువంటి కార్యక్రమాలు విద్యార్థుల్లో భాషా నైపుణ్యాలతో పాటు సృజనాత్మకత, ఆత్మవిశ్వాసాన్ని పెంపొందిస్తాయి” అని అన్నారు.హిందీ దివస్ ప్రాముఖ్యతను విద్యార్థులకు వివరిస్తూ, భారతదేశంలోని భాషా వైవిధ్యాన్ని గౌరవించాల్సిన అవసరాన్ని ఉపాధ్యాయులు తెలియజేశారు. వివిధ కార్యక్రమాల్లో విద్యార్థుల చురుకైన భాగస్వామ్యం అందరినీ ఆకట్టుకుంది.ఈ కార్యక్రమంలో పాఠశాల యాజమాన్య ప్రతినిధులు వి. మర్రెడ్డి, కె. శ్రీనివాసరావు,పాఠశాల ప్రిన్సిపాల్ డి. శివ కుమార్, ఉపాధ్యాయినీ ఉపాధ్యాయులు, విద్యార్థులు పాల్గొని కార్యక్రమాన్ని విజయవంతం చేశారు.