తొలి శుభోదయం న్యూస్ మార్కాపురం:-
మార్కాపురం జిల్లా పామూరులోని రవణమ్మ మెమోరియల్ మల్లికార్జునరెడ్డి మల్టీ స్పెషాలిటీ హాస్పిటల్ ప్రాంగణంలో పీఎంఆర్ యువసేన ఆధ్వర్యంలో మెగా రక్తదాన శిబిరం ఘనంగా నిర్వహించబడింది. సమాజ సేవే లక్ష్యంగా ముందుకు సాగుతున్న పీఎంఆర్ యువసేన మరోసారి తన సేవా తత్పరతను చాటుతూ ఈ మహోన్నత కార్యక్రమాన్ని విజయవంతం చేసింది.ఈ సందర్భంగా రక్తదానానికి ముందుగా వైద్య బృందం రక్తదాతలకు ఆరోగ్య పరీక్షలు నిర్వహించి, అర్హులైన వారి నుంచి రక్తాన్ని సేకరించారు. రక్తదానం ప్రాణదానంతో సమానమనే సందేశాన్ని ప్రజల్లోకి తీసుకెళ్తూ యువత పెద్ద ఎత్తున స్వచ్ఛందంగా ముందుకు వచ్చి రక్తదానం చేయడం విశేషం.పీఎంఆర్ యువసేన అధ్యక్షులు మోషే ఆధ్వర్యంలో నిర్వహించిన ఈ శిబిరానికి కార్యకర్తలు, నాయకులు, యువకులు, ప్రజలు భారీ సంఖ్యలో హాజరై కార్యక్రమాన్ని విజయవంతం చేశారు. సుమారు డెబ్భై మంది రక్తదాతలు తమ అమూల్యమైన రక్తాన్ని దానం చేసి మానవత్వానికి నిదర్శనంగా నిలిచారు. రక్తదాతలు, సహాయకుల కోసం అవసరమైన అన్ని సదుపాయాలను నిర్వాహకులు కల్పించగా, శిబిరం సాయంత్రం 5 గంటల వరకు సజావుగా కొనసాగింది.సేవా కార్యక్రమాల నిర్వహణలో ఎల్లప్పుడూ ముందుండే పీఎంఆర్ యువసేన ఇప్పటికే అనేక సామాజిక సేవా కార్యక్రమాలను చేపట్టి ప్రజల ప్రశంసలు అందుకుంటోంది. ఈ మెగా రక్తదాన శిబిరం ద్వారా అత్యవసర సమయాల్లో ప్రాణాలను కాపాడేందుకు అవసరమైన రక్త నిల్వలు సమకూరనున్నాయని పలువురు హర్షం వ్యక్తం చేశారు.ఈ సందర్భంగా పలువురు ప్రముఖులు మాట్లాడుతూ, “ఒకరి రక్తదానం మరొకరికి ప్రాణదానం అవుతుంది. యువత ఇటువంటి సేవా కార్యక్రమాల్లో భాగస్వాములు కావడం సమాజానికి శుభపరిణామం” అని కొనియాడారు. పీఎంఆర్ యువసేన చేపడుతున్న సేవా కార్యక్రమాలు ఆదర్శప్రాయమని అభినందిస్తూ, భవిష్యత్తులోనూ ఇలాంటి కార్యక్రమాలను మరింత విస్తృతంగా నిర్వహించాలని ఆకాంక్షించారు.